Şəhidlərimiz — I Qarabağ Müharibəsi

Əliyev Fəqan Vəli oğlu 1 yanvar 1967-ci ildə Gəncə şəhərində anadan olmuşdur. O, 20 nömrəli orta məktəbin 8-ci sinfini bitirdikdən sonra 77 saylı texniki-peşə məktəbinə daxil olmuşdur. Fəqan Əliyev 1987-ci ildə Rusiya Federasiyasından hərbi xidmətdən qayıtdıqdan sonra Qənnadı fabrikində, sonra isə Çini qablar zavodunda işləmişdir. O, 19 may 1992-ci il tarixlə Nizami Rayon Hərbi Komissarlığı tərəfindən həqiqi hərbi xidmətə çağırılmış, Ağdərə uğrunda gedən döyüşlərdə uğurla iştirak edərək düşmən texnikasına böyük zərbələr vurmuşdur. Fəqan Əliyev əvvəlcə Gəncə taborunda vuruşmuş, Drambon, Çıldıran, Umudlu, Sırxavənd, Vəng kəndləri uğrunda gedən döyüşlərdə iştirak etmişdir. 1992-ci il noyabr ayının 12-də Fəqan Əliyev Vəng kəndindəki döyüş yoldaşlarına ərzaq apararkən Qozlu körpüsünün yanındakı meşə zolağında pusquya düşmüş, düşmənə xeyli tələfat verdikdən sonra döyüş dostları ilə birlikdə şəhidlik zirvəsinə ucalmışdır. Gəncə şəhəri Şəhidlər Xiyabanında dəfn edilmişdir.