Şəhidlərimiz — I Qarabağ Müharibəsi

Bayramov İsmayıl Məmməd oğlu 23 sentyabr 1966-cı ildə Gəncə şəhərində anadan olmuşdur. O, orta məktəbi bitirdikdən sonra 1984-1986-cı illərdə Almaniya Demokratik Respublikasında həqiqi hərbi xidmətdə olmuşdur. O, xidmətdən qayıtdıqdan sonra Bakı Dəmiryol Texnikumuna daxil olmuş, texnikumu bitirdikdən sonra bir müddət Gəncə şəhər Dəmiryolunda İşarəvermə və Rabitə Distansiyasında radio-mexanik vəzifəsində işləmişdir.
İsmayıl Bayramov Xocalı soyqırımından sonra ağır faciəyə dözə bilməyib 20 mart 1992-ci ildə könüllülər dəstəsinə yazılaraq Gəncə batalyonunda, sonra isə 818 saylı hərbi hissənin tərkibində Tərtər və Ağdərə rayonlarında erməni faşistlərinə qarşı vuruşmuşdur. Bayramov İsmayıl Məmməd oğlu 3 iyul 1992-ci ildə Ağdərə rayonunun Həsənqaya kəndi uğrunda gedən döyüşlər zamanı qəhrəmancasına həlak olmuşdur.