Şəhidlərimiz — I Qarabağ Müharibəsi

Yusifov Fəxrəddin Xəlil oğlu 2 sentyabr 1957-ci ildə Qərbi Azərbaycanın Vedibasar mahalının Xalisa kəndində dünyaya göz açmışdır. O, 1974-cü ildə Xalisa kənd orta məktəbini bitirdikdən sonra həqiqi hərbi xidmətə çağırılmış və Özbəkistan Respublikasının Uçkuduk qəsəbəsində hərbi qulluq keçmişdir. Fəxrəddin Yusifov xidmət etdiyi hərbi hissədə səkkiz ilə yaxın qalıb xidmət etmişdir. 1988-ci ildə Fəxrəddin Yusifovun valideynləri indiki Göygöl rayonuna pənah gətirmişlər. O, hərbidən qayıtdıqdan sonra bir müddət 16 saylı səyyar mexanikləşdirilmiş dəstədə dülgər işləmişdir. Vətənin başı üzərini qara buludlar alan zaman Fəxrəddin Yusifov buna çox narahat olmuş, ailədə narazılıqlar olmasına baxmayaraq şaxtalı bir qış günü öz ərizəsi əsasında könüllü olaraq Gəncədə yaradılmış «Kəpəz» batalyonunun tərkibində Vətənin müdafiəsinə qalxmışdır. Sovet ordusunda qazandığı 8 illik hərbçi təcrübəsi əsasında Fəxrəddin yüksək döyüş sənətinə yiyələnmiş, həmişə döyüşlərdə öndə getmiş və pulemyotçu kimi cəbhəyə yollanaraq dəfələrlə ağır döyüş əməliyyatlarında iştirak etmişdir. 3 yanvar 1994-cü ildə Ağdərə istiqamətində gedən qanlı döyüşlərdə «Kəpəz» batalyonu xüsusi fədakarlıq föstərmişdir. Fəxrəddingilin batalyonu Levonarx-Ağdərə istiqamətində vuruşmuşdur. Qeyri-bərabər gedən qanlı döyüşdə ermənilərin texnika və canlı qüvvəsinin say üstünlüyünü görən bacarıqlı döyüşçü xidmət etdiyi batalyonun tamam məhv olmaq təhlükəsini hiss etmiş və ölümün gözünə dik baxaraq təkbaşına pulemyotu dilə gətirib düşmən qabağını kəsmişdir. Həmin döyüş zamanı özü ağır yaralansa da, 23 yaralı və 43 döyüşçünün həyatını xilas edən Fəxrəddin Yusifov çoxlu qan itirdiyi üçün taqətdən düşmüşdür. Döyüşçü dostları onu döyüş zonasından çıxartmağa cəhd etsələr də, əvvəlcə bunu bacara bilməsələr də üç günlük qanlı döyüşlərdən sonra Fəxrəddinin cəsədi döyüş bölgəsindən çıxarılmışdır. 9 yanvar 1994-cü ildə dörd övlad atası olan qəhrəman eloğlumuz Yusifov Fəxrəddin Xəlil oğlu ömrünün 37 yaşında dünyasını dəyişmiş və Göygöl rayonu Şəhidlər Xiyabanında dəfn olunmuşdur.