Şəhidlərimiz — I Qarabağ Müharibəsi

Məmmədov Zabit Ənvər oğlu 1968-ci ildə Tovuz rayonunun Sarıtala kəndində anadan olmuşdur. O, Sarıtala kənd orta məktəbini bitirdikdən sonra Volqaqradda hərbi xidmətdə olmuşdur. Zabit Məmmədov hərbidən qayıtdıqdan sonra Gəncə Toxuculuq kombinatında əmək fəaliyyətinə başlamışdır. O, 1988-ci ildə ailə qurmuşdur. Zabit Məmmədov 1993-cü ildə Kəpəz Rayon Hərbi Komissarlığı tərəfindən cəbhəyə çağırılmışdır. 1994-cü ildə Qubadlı rayonunun müdafiəsi zamanı yaralansa da, müalicə olunduqdan sonra yenə cəbhəyə yollanmışdır. Bir neçə döyüş tapşırıqlarının həyata keçirilməsində layiqli iştirak etmiş, tez bir zamanda özünəməxsus döyüş qabiliyyəti ilə əsgər yoldaşları arasında böyük hörmət sahibi olmuşdur. Məmmədov Zabit Ənvər oğlu 25 aprel 1994-cü ildə Füzuli rayonunun Yuxarı Veysəlli kəndi uğrunda gedən mübarizə zamanı döyüş tapşırığını yerinə yetirərkən yaralanaraq ermənilər tərəfdə qalmış və 20 may 1994-cü ildə hökumət orqanları tərəfindən ermənilərlə danışıq aparılaraq meyiti geri alınmışdır. Zabit Məmmədov Tovuz rayonunun Sarıtala kəndində dəfn olunmuş və şəhidin ruhuna hörmət əlaməti olaraq Sarıtala kənd orta məktəbi onun adını daşıyır.