Şəhidlərimiz — I Qarabağ Müharibəsi

Mehrəliyev Rövşən Aftandil oğlu 29 dekabr 1969-cu ildə Gəncə şəhərində anadan olmuşdur. O, 34 saylı orta məktəbin 9-cu sinfini bitirdikdən sonra,  1984-cü ildə Gəncə şəhəri 38 saylı texniki-peşə məktəbinə daxil olmuş və 21 iyul 1987-ci ildə dülgərlik peşəsinə yiyələnərək həmin peşə məktəbini əla qiymətlərlə bitirmişdir. Rövşən Mehrəliyev 1987-1989-cu illərdə Amur şəhərində hərbi xidmətdə olmuşdur. O, hərbidən qayıtdıqdan sonra Gəncə şəhəri 3 saylı SU-31 Tikinti Trestində fəhlə işləmişdir. Rövşən Mehrəliyev 1992-ci ildə ailə qurmuş, Rövşanə adlı bir qızı dünyaya gəlmişdir. O, 1992-ci ilin iyununda cəbhəyə yollanmış, Ağdam rayonunun müdafiəsində böyük qəhrəmanlıq göstərmiş, bir neçə döyüş əməliyyatlarında fəal iştirak etmişdir. Mehrəliyev Rövşən Aftandil oğlunun döyüş yolu çox qısa olmuş, bir aydan sonra, yəni 21 iyul 1992-ci ildə o, Ağdam rayonunun Şelli kəndi uğrunda gedən döyüşlərdə itkin düşmüşdür.