Şəhidlərimiz — I Qarabağ Müharibəsi

Qoçəliyev Hafiz Sabir oğlu 19 sentyabr 1976-ci ildə Gəncə şəhərində anadan olmuşdur. O, 43 saylı orta məktəbi bitirmişdir. İdmanın futbol növünü çox sevsə də Hafizin həvəsi polis vəzifəsinə yiyələnmək olmuşdur. O, 1993-cü ildə orta məktəbi bitirmiş, 22 oktyabr 1994-cü ildə Kəpəz Rayon Hərbi Komissarlığı tərəfindən həqiqi hərbi xidmətə çağırılmış, 127 saylı hərbi hissənin tərkibində xidmət etməyə başlamışdır. Hafiz Qoçəliyev Bərdə, Beyləqan rayonlarının müdafiəsində böyük igidlik göstərmiş, komandirləri tərəfindən ona verilən tapşırıqları vaxtında və layiqli yerinə yetirmişdir. Gənc qəhrəmanın döyüş yolu çox qısa olsa da, yüksək səviyyədə hərbi xidmət göstərmiş Hafiz tez bir zamanda zabit-əsgər heyətinin böyük hörmətini qazanmışdır. Qoçəliyev Hafiz Sabir oğlu 22 dekabr 1994-cü ildə düşmən gülləsinə tuş gələrək qəhrəmancasına şəhid olmuş və Gəncə şəhər Şəhidlər Xiyabanında dəfn olunmuşdur.