Şəhidlərimiz — I Qarabağ Müharibəsi

Qasımov Raif Yaqub oğlu 14 dekabr 1961-cı ildə Goranboy rayonunun Qırıxlı kəndində anadan olmuşdur. O, orta məktəbi bitirdikdən sonra Murmansk vilayətində hərbi xidmətdə olmuşdur. Raif Qasımov hərbidən qayıtdıqdan sonra Kiyev şəhərində gizirlik məktəbində oxumuş, sonra isə Gəncə şəhərində 23-cü diviziyada gizir kimi xidmət göstərməyə başlamışdır. O, 1985-ci ildə ailə qurmuş, Venera, Elvira, Elmira adlı üç qız övladı dünyaya gəlmişdir. Raif Qasımov 1992-ci ildə könüllü olaraq cəbhəyə yollanmış, Naxçıvanski, Xankəndi uğrunda gedən döyüşlərdə igidlik göstərmişdir. Sonra isə xidmətini Gədəbəy rayonunun Şınıx bölgəsində yerləşən 816 saylı hərbi hissədə davam etdirmişdir. Qasımov Raif Yaqub oğlu Mutudərə kəndi uğrunda gedən döyüşlərdə 21 sentyabr 1992-ci ildə minaya düşərək həlak olmuş və 23 sentyabr 1992-ci ildə Goranboy rayonunun Qırıxlı qəbiristanlığında dəfn olunmuşdur. Raif Qasımovun ruhuna hörmət əlaməti olaraq oxuduğu Qırıxlı kənd orta məktəbinə onun adı verilmişdir.