Şəhidlərimiz — I Qarabağ Müharibəsi

 Sakit Atakişiyev 1962-ci il martın 15-də Gəncə şəhərində anadan olmuşdur. 23 saylı orta məktəbin 8-ci sinfinədək oxuduqdan sonra 15 saylı texniki-peşə məktəbini bitirmişdir. 1980-1982-ci illərdə Vladivostokda həqiqi hərbi xidmətdə olmuşdur. Qayıtdıqdan sonra bir müddət Daşkəsən rayonunda işləmişdir. 1992-ci il mart ayının 18-də Nizami Rayon Hərbi Komissarlığının çağırışı ilə ordu sıralarına getmiş, 773 saylı hərbi hissədə xidmət etmişdir. Daşaltı, Turşsu, Güləbir, Laçın, Qubadlı əməliyyatlarında fərqlənmişdir. Böyük igidlik göstərən Sakit Atakişiyev hücum vaxtı döyüş dostlarından geri qalmır, düşmənə qarşı hazırlanan əməliyyatlara birbaşa rəhbərlik etmişdi. BTR sürürdü.

1992-ci ilin yayında Sur kəndi uğrunda qızğın döyüşlər gedirdi. Düşmən qrad və alazan tipli silahlardan aramsız atəş açırdı. Atakişiyevin rəhbərlik etdiyi dəstənin yolu minalanmış ensiz meşə zolağından keçirdi. Bu yol Sakit Atakişiyevin ömründə sonuncu, qısa yolu oldu. 1992-ci ilin iyunun 28-də Sakit İspi oğlu Atakişiyev minaya düşərək şəhid oldu. 2 oğlu yadigar qaldı.