Şəhidlərimiz — I Qarabağ Müharibəsi

İsgəndərov Vaqif Əli oğlu 13 may 1969-cu ildə Qərbi Azərbaycanın Samluq qəsəbəsində anadan olmuşdur. 1976-cı ildə Şamluq qəsəbəsi orta məktəbinin 1-ci sinfinə getmiş, 1983-cü ildə isə orta məktəbin 8-ci sinfini bitirmişdir. Vaqif İsgəndərov Azərbaycan SSR-nin Kiravobad (Gəncə) şəhərində yerləşən 27 saylı texniki-peşə məktəbində təhsilini davam etdirmiş və 1986-cı ildə peşə məktəbini fərqlənmə ilə bitirmişdir. O, 1987-ci ildə həqiqi hərbi xidmətə çağırılmış və Rusiya Federasiyasının Murmansk vilayətinin Mançeqorsk şəhərində xidmətini başa vurub 1989-cu ildə geri qayıdaraq Gəncə şəhərinə gəlmişdir. Vaqif İsgəndərov Kəpəz Rayon Hərbi Komissarlığı tərəfindən 26 oktyabr 1992-ci ildə hərbi xidmətə çağırılmış və  001 saylı hərbi hissənin tərkibində xidmət göstərməyə başlamışdır. O, 27 oktyabr 1992-ci ildə Ağdam və Ağdərə rayonlarının müdafiəsində gedən döyüşlərdə qəhrəmanlıq göstərmişdir. Vaqif İsgəndərov Murov dağında gedən döyüşlərdən qayıtdıqdan sonra 02 noyabr 1992-ci ildə 3 saylı batalyonun tərkibində Tovuz, Ağstafa, Gədəbəy uğrunda gedən döyüşlərdə iştirak etmişdir. O, 30 dekabr 1992-ci ildə Gədəbəy rayonunun Saratovka kəndi uğrunda gedən qızğın döyüşlərin birində düşmən snayperinin gülləsinə tuş gələrək qəhrəmancasına həlak olmuş və Gəncə şəhər Şəhidlər Xiyabanında dəfn olunmuşdur.