Şəhidlərimiz — I Qarabağ Müharibəsi

İsayev Qulu Mirzə oğlu 6 fevral 1966-cı ildə Tovuz rayonunun Çeşməli kəndində anadan olmuşdur. O, 1983-cü ildə Çeşməli kənd orta məktəbini bitirdikdən sonra həqiqi hərbi xidmətə çağırılmış və sovet ordusu sıralarında iki il qulluq etmişdir. Qulu İsayev 1987-ci ildə Politexnik Institutuna daxil olmuş, institutu fərqlənmə ilə bitirdikdən sonra Gəncə Alüminium zavodunda işləmişdir. Qulu İsayev Azərbaycan torpaqlarının bütövlüyü uğrunda gedən döyüşlərə qatılmış, Qazax, Ağdam, Qubadlı rayonlarının müdafiəsində 902 saylı hərbi hissənin tərkibində böyük qəhrəmanlıq göstərmişdir. Qulu İsayevin döyüş yolu çox qısa olmuş, 31 avqust 1993-cü ildə Qubadlı rayonu uğrunda gedən döyüşlərdə itkin düşmüşdür. Tovuz rayon Xalq Məhkəməsinin 2-108 1997-ci il tarixli qətnaməsi ilə Qulu İsayevin itkin düşməsi faktı təsdiqlənmişdir. O, ailəli olmuş, Oral və İlahə adlı iki övladı var.