Şəhidlərimiz — I Qarabağ Müharibəsi

Xudiyev Vaqif Firuddin oğlu 25 mart 1965-ci ildə İmişli rayonunun Şahverdili kəndində anadan olmuşdur. Hələ uşaq yaşlarında ikən valideynləri ilə birlikdə Gəncə şəhərinə köçmüş və 1982-ci ildə Gəncə şəhəri 34 saylı orta məktəbi bitirmişdir. O, orta məktəbi bitirdikdən sonra Sverdlovsk şəhərində Ali Hərbi Məktəbə daxil olmuş və 1986-cı ildə həmin məktəbi fərqlənmə ilə başa vurmuşdur. Bundan sonra Vaqif Xudiyev Ukrayna Respublikasının Çerniqov şəhərində leytenant kimi hərbçi fəaliyyətinə başlamışdır. O, 1988-ci ildə ailə qurmuş və 2 övladı dünyaya gəlmişdir. 1992-ci ildə vətənin başı üzərini qara buludlar alan zaman Vaqif Xudiyev Gəncə şəhərinə gəlmiş, 930 saylı hərbi hissənin tərkibində mayor rütbəsi ilə batalyon komandiri vəzifəsində xidmət etmişdir. 1993-cü ildə 930 saylı hərbi hissə Tərtər rayonuna köçdüyü üçün Vaqif Xudiyev xidmətini hərbi hissənin tərkibində Tərtər rayonunda davam etdirmişdir. 1994-cü ildə 930 saylı hərbi hissə Füzuli rayonu ərazisində yerləşən 706 saylı hərbi hissəyə köçürülmüşdür. Vaqif Xudiyev 7 mart 1994-cü il tarixdə Cəbrayıl rayonunun Cocuqmərcanlı kəndi uğrunda gedən qızğın döyüşlərin birində şəhid olmuş və 8 mart 1994-cü il tarixdə İmişli rayonunun Göbəktala kəndində dəfn olunmuşdur. Azərbaycan Respublikası Prezidentinin fərmanı ilə 1994-cü ilin iyul ayında Azərbaycan torpaqlarının erməni işğalçılarından müdafiəsində gedən döyüşlərdə şəxsi igidlik və şücaətinə görə Xudiyev Vaqif Firuddin oğlu ölümündən sonra «Azərbaycan bayrağı» ordeni ilə təltif olunmuşdur. Şəhidin ruhuna hörmət əlaməti olaraq İmişli şəhərində yerləşən «Araz» mədəniyyət sarayı Vaqif Xudiyevin adını daşıyır.