Şəhidlərimiz — I Qarabağ Müharibəsi

Hüseynov İmamverdi Hüseyn oğlu 28 mart 1958-ci ildə Samux rayonunun Aşağıbəyli kəndində anadan olmuşdur. O, həmin kənd orta məktəbinin 9-cu sinfini bitirdikdən sonra Gəncə şəhərində yerləşən 77 saylı texniki-peşə məktəbində təhsilini davam etdirmiş və dülgərlik peşəsinə yiyələnmişdir. İmamverdi Hüseynov 1976-cı ildə həqiqi hərbi xidmətə çağırılmış, 1978-ci ilə kimi Lvov şəhərində xidmət etmişdir. O, hərbidən qayıtdıqdan sonra Gəncə şəhər Taxıl Məhsulları Kombinatında fəhlə kimi əmək fəaliyyətinə başlamış, qabaqcıl işçılərdən olmuşdur. İmamverdi Hüseynov 1982-ci ildə ailə qurmuş və bir qız övladı dünyaya gəlmişdir. O, 1992-ci ilin fevral ayında könüllü əsgərliyə getmiş və 708 saylı hərbi hissənin tərkibində xidmət etməyə başlamışdır. Hüseynov İmamverdi Hüseyn oğlu 1994-cü ilin yanvar ayının 4-də Beyləqan rayonunun müdafiəsində düşmən gülləsi nəticəsində beyin nahiyyəsindən yaralanmış, dəfələrlə beyin və sinir nahiyyələrindən əməliyyat olunmuş, sonuncu dəfə 5 may 1997-ci il tarixdə Gəncə şəhər Təcili Tibbi Yardım Xəstəxanasında müalicə olunsa da, aldığı güllə yarası nəticəsində vəfat etmişdir. İmamverdi Hüseynov İmamzadə qəbiristanlığında dəfn olunmuşdur.