Şəhidlərimiz — I Qarabağ Müharibəsi

Aslanov Zöhrab Qasım oğlu 23 fevral 1955-ci il tarixdə Goranboy rayonunda anadan olmuşdur. Vətənin ərazi bütövlüyü uğrunda gedən döyüşlər zamanı Zöhrab Aslanov könüllü olaraq əsgərliyə yollanmış, 410 saylı hərbi hissənin tərkibində vuruşmuşdur. Gizir rütbəsinə yüksələn Zöhrab Aslanov komandirlərin verdiyi tapşırıqları böyük qəhrəmanlıqla yerinə yetirmişdir. Zöhrab Aslanov növbəti döyüş əməliyyatını yerinə yetirməyə göndərilmiş, Bakı şəhəri üzərində silah gətirən zaman Zöhrab Aslanovun təyyarəsi erməni işğalçıları tərəfindən vurulmuşdur. Yaralı vəziyyətdə xəstəxanaya çatdırılan Zöhrab Aslanovun həyata qaytarılması naminə həkimlər böyük cəhdlər göstərsələr də 11 dekabr 1993-cü il tarixdə o, Bakı şəhərində yerləşən Cavadzadə adına xəstəxanada vəfat etmişdir. Onun meyiti Gəncə şəhərinə gətirilərək valideynlərinə təhvil vermiş və Aslanov Zöhrab Qasım oğlu Şəhidlər Xiyabanında dəfn edilmişdir.