Şəhidlərimiz — I Qarabağ Müharibəsi

Əliyev Ruhlan Novruz oğlu 19 sentyabr 1974-cü ildə Qərbi Azərbaycanın Zəngibasar rayonunun Zəngilər kəndində ziyalı ailəsində anadan olmuşdur. O, 1981-ci ildə Zəngilər kənd orta məktəbinin 1-ci sinfinə getsə də 1988-ci ildə valideynləri ilə birlikdə öz tarixi torpaqlarından qovulub Gəncə şəhərinə pənah gətirmişlər. Ruhlan Əliyev Gəncə şəhəri 19 saylı beynəlmiləl məktəbin rus bölməsində təhsilini davam etdirmişdir. O, 1989-cu ildə 8-ci sinfi bitirdikdən sonra Gəncə Avtomexanika Texnikumuna qəbul olmuş və 1993-cü ildə texnikumu fərqlənmə diplomu ilə qurtarmışdır. O, 1993-cü ildə texnikumu bitirdikdən sonra Kəpəz rayon Hərbi Komissarlığı tərəfindən orduya çağırılmış, Azərbaycanın bir çox rayon və kəndlərinin erməni işğalçılarından müdafiə olunmasında böyük qəhrəmanlıq göstərmişdir. Əliyev Ruhlan Novruz oğlu 1994-cü il mart ayının 20-də səhər saat 07 radələrində Füzuli rayonunun Alıxanlı kəndinin erməni işğalçılarından müdafiə olunması zamanı böyük igidlik göstərərək şəhidlik zirvəsinə ucalmış və Gəncə şəhər Şəhidlər Xiyabanında dəfn olunmuşdur.