Şəhidlərimiz — I Qarabağ Müharibəsi

Abdullayev Rafail Yaşar oğlu 29 may 1953-cü ildə Gürcüstan Respublikasının Rustavi şəhərində anadan olmuşdur. O, 1980-ci ildə orta məktəbi bitirdikdən sonra 1981-ci ildə həqiqi hərbi xidmətə çağırılaraq Obninsk şəhərində hərbi xidmət keçmişdir. Rafail Abdullayev 1984-cü ilin dekabr ayında ailə həyatı qurmuş, Renat və Tofik adlı iki oğlan övladı dünyaya gəlmişdir. O, 1991-ci ildə ailəsi ilə birlikdə Gəncə şəhərinə köçmüş və həmin il Gəncə şəhəri Kərpic zavodunda çilingər vəzifəsində işləməyə başlamışdır. Rafail Abdullayev 1993-cü il oktyabr ayının 29-da könüllü olaraq cəbhəyə yollanmış, 703 saylı hərbi hissənin tərkibində Tərtər rayonunun müdafiəsində böyük qəhrəmanlıqlar göstərmiş, kəşfiyyatçılar qrupunun tərkibində bir neçə döyüş əməliyyatlarında iştirak etmişdir. O, nizam-intizamı və istiqanlılığı ilə döyüş yoldaşlarının hörmətini qazanmışdır. Abdullayev Rafail Yaşar oğlu 13 aprel 1994-cü ildə Papravənd kəndi uğrunda gedən döyüşdə həlak olaraq şəhidlik zirvəsinə ucalmışdır.