Şəhidlərimiz — I Qarabağ Müharibəsi

İmran Rzayev 1963-cü il yanvarın 26-da Gəncə  şəhərində anadan olmuşdur. İstiqanlı, mehriban oğlan idi. Orta təhsilini 9 saylı orta məktəbdə almışdır. Orta məktəbi bitirdikdən sonra Gəncədə Evtikmə Kombinatında işləmişdi. Hələ 1989-cu ildə xüsusi inşaat briqadasının tərkibində Xocalıda   abadlıq işlərində fəal iştirak etmişdi.

İmran Rzayev 1993-cü il noyabrın 25-də  Kəpəz Rayon Hərbi Komissarlığı tərəfindən həqiqi hərbi  xidmətə çağırılmışdır. Cəbhə bölgəsində gənc döyüşçünün bir çox uğurları olmuşdur. Erməni işğalçılarına qarşı hazırlanan hərbi  əməliyyatlarda fəal iştirak etmişdi. Tərtər rayonunun Çaylı, Həsənqaya, Levonarx kəndləri, Ağdərənin bir neçə yaşayış məntəqəsi uğrunda gedən döyüşlərdə əsil igidlik nümunəsi göstərmişdi. yüksək döyüş şücaətinə görə gizir rütbəsinə layiq görülmüşdü. İmran Rzayev bölmə komandiri kimi tabeliyindəki əsgərləri mərdliklə döyüşə səfərbər edirdi. İmran Rzayevin göstərdiyi yüksək xidmət hərbi hissə komandiri tərəfindən layiqincə qiymətləndirilib.

İmran rəhim oğlu Rzayev 1994-cü il may ayının 3-də Qırmızıkəndin müdafiəsi uğrunda gedən ağır döyüşlər zamanı şəhidlik zirvəsinə ucalmışdır. İki övladı var idi. Atasının yoxluğuna dözə bilməyən Elçin 1995-ci il fevralın 7-də  dünyasını dəyişdi. Mərhumun həyat yoldaşı Sevda xanım min əzaba qatlaşaraq əziyyətlər bahasına Leylanı böyüdür.