Şəhidlərimiz — I Qarabağ Müharibəsi

Əfqan Rzayev 1970-ci il martın 12-də Gəncə  şəhərində anadan olmuşdur. 1987-ci ildə Gəncə şəhərində 4 saylı məktəbi bitirdikdən sonra bir müddət Tikinti İdarəsində bənna işləmişdir.

Əfqan Rzayev 1988-ci ilin may ayında həqiqi hərbi xidmətə çağırılmış, gənc hərbçi Rzayev ilk altı ay Jitomir vilayətində, sonra isə Çexoslovakiyada həqiqi hərbi xidmətdə olmuşdur. T-72 tankı üzrə baş mexanik-sürücü ixisasına yiyələnmişdi. 1990-cı ildə hərbi xidmətdən qayıdan Əfqan əvvəlcə iş yerində, yəni Tikinti İdarəsində işə düzəlib, 5-ci dərəcəli krançı  vəzifəsində çalışmışdır.

1992-ci il fevralın 26-da erməni qəsbkarları tərəfindən törədilən Xocalı faciəsindən sonra silaha sarılaraq könüllü surətdə milli ordu sıralarına yazılmışdı. Xüsusi təyinatlı polis dəstəsində vuruşmuşdu. Ağır döyüşlərdə iştirak etmişdi. Ağdamın bir neçə kəndi uğrunda gedən mübarizədə xüsusi  fədakarlıq göstərmişdi.

Əfqan Məcid oğlu Rzayev 1992-ci il iyul ayının 9-da Ağdərənin müdafiəsində gedən qızğın döyüşlərin birində qəhrəmancasına şəhid olmuşdur.