Şəhidlərimiz — I Qarabağ Müharibəsi

Rüstəmov İdris Bayram oğlu 1961-ci il aprel ayının 25-də Gəncə şəhərində anadan  olmuşdur. 37 saylı orta məktəbi bitirmişdir. İdris Rüstəmov 1979-1981-ci illərdə Sovet ordusu sıralarında həqiqi hərbi xidmətdə olmuşdur. İdris yad ölkədə vətənin adını uca tutmuşdu. Hərbi xidmətdən qayıtdıqdan sonra bir müddət Cihazqayırma zavodunda çilingər kimi çalışmışdır. Vətənin başı üstünü qara buludlar alanda İdris sakit dura bilmir, 1992-ci ilin mart ayında könüllü olaraq döyüş bölgəsinə yollanır. 826 saylı hərbi hissənin tərkibində Ağdamda vuruşmuşdu. Əsas xidmət yolu Sərsəng Su Anbarının müdafiəsində keçmişdir. Növbəti dəfə ermənilər çoxlu sayda canlı və  texnika ilə hücuma keçəndə İdris  18 nəfərlə mühasirəyə düşmüş, beş saat davam edən qeyri-bərabər döyüşdə düşmənə xeyli itki vermişdi. İdris Bayram oğlu Rüstəmov əsil mərdlik göstərərək mühasirə şəraitində döyüş dostlarını xilas edərkən 1992-ci il iyunun 28-də həlak olmuşdur.