Şəhidlərimiz — I Qarabağ Müharibəsi

Nuriyev Ayaz Yusif oğlu 13 yanvar 1967-ci ildə Qərbi Azərbaycanın Vardenis rayonunun Şişqaya kəndində anandan olmuşdur. O, 1973-cü ildə Şişqaya kənd orta məktəbinin birinci sinfinə daxil olmuş, 1984-cü ildə həmin məktəbin 10-cu sinfini bitirmişdir. O, 1985-ci ilin aprel ayından 1987-ci ilin iyun ayının 15-nə kimi sovet ordusu sıralarında hərbi xidmətdə olmuşdur. Ayaz Nuriyev hərbidən qayıtdıqdan sonra 1987-ci ildə Azərbaycan Texnologiya İnstitutuna daxil olmuş, həmin institutu 1992-ci ildə bitirdikdən sonra azad təyinatla 10 avqust 1992-ci ildən etibarən Gəncə şəhəri Gil-Torpaq İstehsalat Birliyinin 2 nömrəli Gil-torpaq və buxarlandırma sexində 4-cü dərəcəli çilingər vəzifəsində işləməyə başlamışdır. O, ailə qurmuş, iki qız övladı dünyaya gəlmişdir. Bundan sonra o, 18 avqust 1993-cü ildə Tərtər rayonu ərazisində yerləşən 703 saylı hərbi hissəsinin qərargahında 8-ci şöbənin rabitə üzrə baş mütəxəssisi vəzifəsində işləməyə başlamışdır. Ayaz Nuriyev 10 yanvar 1994-cü ildə Tərtər rayonunun döyüş bölgəsinə göndərilmiş, həmin döyüşdə yaralanaraq uzun müddət Tərtər rayonunun hərbi hospitalında müalicə olunduqdan sonra yenidən öz hərbi hissəsinə göndərilmişdir. O, 21 mart 1994-cü ildə 703 saylı hərbi hissənin məxfi hissə rəisi təyin olunmuş, sonra isə 1 iyun 1994-cü ildən etibarən Tərtər-2 batalyonunda bölük giziri vəzifəsinə göndərilmişdir. Uzun müddət orada xidmət etdikdən sonra isə 1994-cü ilin dekabr ayında Tərtər rayonunun Çaylı kəndində 4-cü bölüyə gizir vəzifəsinə göndərilmişdir. Nuriyev Ayaz Yusif oğlu Tərtər rayonunun Çaylı kəndində xidməti vəzifəsini yerinə yetirərkən 13 yanvar 1995-ci ildə qəhrəmancasına həlak olmuşdur.