Şəhidlərimiz — I Qarabağ Müharibəsi

Ələsgər Namazov 1954-cü il aprelin 9-da Gəncə şəhərində anadan olmuşdur. 40 saylı orta məktəbin 8-ci sinfini bitirdikdən sonra texniki-peşə məktəbində təhsil almışdı. Ələsgər Namazov 1972-1974-cü illərdə Qazaxıstanın Şevçenko şəhərində həqiqi hərbi xidmətdə olmuşdur. Hərbi xidməti başa vurduqdan sonra bir müddət Amur vilayətində inşaatçı işləmişdir.   Sonra vətənə qayıtmışdı. Gəncə Tikinti İdarəsində suvaqçı-rəngsaz işləmişdir. 1984-cü ildə ailə həyatı qurmuşdur.

Ələsgər Namazov 1992-ci il dekabrın 5-də könüllü  olaraq cəbhəyə getmişdi. 025 saylı hərbi hissədə tağım komandirinin müavini vəzifəsində xidmət etmişdi. Ələsgər Namazovun xidmət etdiyi batalyonun komandiri leytenant Məhərrəm Əhmədov Ələsgəri belə xatırlayır: Əla döyüşçü kimi tanınırdı. Ələsgər Namazov batalyonun yaşlı hərbçisi olmasına baxmayaraq, cəsurluğu və igidliyi ilə seçilirdi. Bütün döyüşçülər həmişə zarafatla Ələsgəri «ağsaqqal» deyə çağırırdılar. O, yanvarın 19-da Fərrux dağında keçirilmiş döyüşdə iştirak etmişdi. Döyüş 12 saat davam etmişdi. Həmin döyüşdə Ələsgər 30-a yaxın erməni quldurunu məhv etmişdi. O, 3 dəfə kəşfiyyata gedərək düşmən mövqelərini müəyyən edə bilmişdi.

Ələsgər Namazov döyüşün ertəsi günü, 1993-cü il yanvarın 20-də növbəti tapşırığı yerinə yetirərkən Fərrux dağı yaxınlığında düşmən gülləsinə tuş gələrək qəhrəmancasına şəhidlik zirvəsinə ucalmışdır. Gəncə Şəhidlər Xiyabanında dəfn olunmuşdur. 2 qızı və 1 oğlu var.