Şəhidlərimiz — I Qarabağ Müharibəsi

Mustafayev İlqar Firuddin oğlu 29 mart 1974-cü ildə Gəncə şəhərində anadan olmuşdur. 27 saylı texniki-peşə məktəbini bitirdikdən sonra könüllü olaraq cəbhəyə getmişdir. Beyləqan uğrunda gedən döyüşlərdə İlqar Mustafayev ağır yaralanaraq evə qayıtmışdır. O, müalicə olunduqdan sonra sağalan kimi yenidən cəbhəyə getməyə can atmış, bunun üçün dəfələrlə hərbi komissarlığa müraciət etmişdir. Nəhayət, İlqar Mustafayev 6 oktyabr 1993-cü ildə Kəpəz Rayon Hərbi Komissarlığı tərəfindən səfərbərliyə alınmış, 99713 saylı hərbi hissənin tərkibində sıravi atıcı kimi xidmət etmişdir.
Tez bir zamanda şəxsi heyətin böyük hörmətini qazanmışdır. O, Beyləqan, Ağcabədi, Füzuli rayonlarının müdafiəsində böyük hünər göstərmişdir. Mustafayev İlqar Firuddin oğlu 22 mart 1994-cü ildə 5 nəfər döyüşçü ilə birlikdə Füzuli rayonu ərazisində döyüş tapşırığını yerinə yetirərkən minaya düşərək həlak olmuşdur.