Şəhidlərimiz — I Qarabağ Müharibəsi

Müzadil Məmmədov 1950-ci il noyabrın 9-da  Gəncə şəhəri Şahsevən küçəsindəki 130 saylı evdə anadan olmuşdur. Orta təhsilini 7 saylı orta məktəbdə almışdır. Orta məktəbi əla qiymətlərlə bitirən Müzadil dəfələrlə tarix fənnindən respublika olimpiadasının qalibi olmuşdur. Orta məktəbi bitirəndən sonra 1968-1970-ci illərdə Türkmənistanda həqiqi hərbi xidmətdə olmuşdur. Qumbaraatan bölüyündə xidmət edən Müzadil vətənin adını hər an uca tutub, ona verilən əmr və tapşırıqları vaxtlı-vaxtında və layiqincə yerinə yetirdiyindən zabit-gizir heyətinin hörmətini qazanmışdı.

Hərbi xidmətdən qayıtdıqdan sonra bir müddət Rusiyanın müxtəlif şəhərlərində sürücü işləmişdir. 1989-cu ildə Gəncəyə qayıtmış, 1990-cı  ildə ailə həyatı qurmuşdur.

Vətənin başı üstünü qara buludlar alanda Müzadil Məmmədov 1992-ci ilin avqust ayının 17-də Nizami Rayon Hərbi Komissarlığı tərəfindən səfərbərliyə alınmışdı. Drambon döyüşündə böyük qəhrəmanlıq göstərmişdi. Müzadil Hüseynalı oğlu Məmmədov hərbi xidmətə gedəndən cəmi 1 ay sonra, 1992-ci il sentyabr ayının 7-də Tərtər rayonunun Goran kəndində həlak olmuşdur. Məzarı Gəncə Şəhidlər Xiyabanındadır. Ölümündən sonra 1 qız övladı dünyaya gəlmişdir.