Şəhidlərimiz — I Qarabağ Müharibəsi

Taleh Məmmədov 1968-ci il avqust 28-də Gəncə şəhərində anadan olmuşdur. 27 saylı texniki-peşə məktəbini bitirmişdir. 1987-1989-cu illərdə almaniyada həqiqi hərbi xidmətdə olmuşdur. Hərbi xidmətdə olarkən gənc döyüşçü Məmmədov atıcı silahların təmiri ustası peşəsinə yiyələnmişdir.
Hərbi xidmətdən qayıtdıqdan sonra Taleh Gəncə şəhər Cihazqayırma zavodunda çilingər işləmişdir. Azərbaycanın başı üstünü qara buludlar alanda Taleh Məmmədov könüllü olaraq Özünümüdafiə batalyonuna yazılmışdı. İlk döyüşləri olan Ağdam rayonunun Pircamal, Abdal-Gülablı kəndləri uğrunda böyük fədəkarlıq göstərmişdi. Fəal atıcı kimi tanınırdı.

Telejurnalist Çingiz Mustafayevin döyüş bölgəsindən çıxarılmasında Talehin böyük xidməti olmuşdur. Taleh Məmmədov 1992-ci il iyunun 17-də Naxçıvanik uğrunda gedən döyüşdə beş-altı qəlpə yarası almışdır. Bakıda müalicə olunmuşdur. Sağaldıqdan sonra döyüş bölgəsinə qayıdan Taleh bir neçə kəndin müdafiəsində böyük igidlik göstərmişdir.

Taleh İsgəndər oğlu Məmmədov 1992-ci il  oktyabrın 29-da Ağdamın Şelli kəndində yaralıları döyüş bölgəsindən çıxararkən şəhidlik zirvəsinə ucalmışdır. Məzarı Gəncə şəhidlər Xiyabanındadır.