Şəhidlərimiz — I Qarabağ Müharibəsi

Abdullayev Yusif Məmməd oğlu 1959-cu ildə Gəncə şəhərində anadan olmuşdur. 89 saylı  texniki-peşə məktəbini bitirmişdir. Yusif Abdullayev əsgərlikdən qayıtdıqdan sonra ailə qurmuşdu. 3 övladı var: Rəhman, Etibar, Lalə.

Azərbaycanın başı üstünü qara buludlar alanda Yusif könüllü olaraq cəbhəyə getmişdir. 181 saylı hərbi hissədə xidmət etmişdir. Sarısu və Qarabulaq kəndləri uğrunda gedən döyüşlərdə ayağından yaralanmışdır. Ürəyi vətənin azadlığı həsrəti ilə döyünən gənc hərbçi Yusif Abdullayev sağaldıqdan sonra yenə də cəbhəyə qayıtmışdır. Yusif Abdullayevin göstərdiyi igidlikləri çoxdur. O, döyüş bacarığı ilə şəxsi heyətin böyük hörmətini qazanmışdır. Beyləqan və Harami düzündə gedən qızğın döyüşlərdə Yusif Abdullayev əl qumbarası ilə düşmənin üç zirehli tankını partlatmış, üstündə saxladığı sonuncu qumbaranı isə sinəsinə sıxaraq özünü düşmən tankının altına atmışdır.

Beləliklə, Yusif Məmməd oğlu Abdullayev hər kəsə nəsib olmayan böyük qəhrəmanlıq rəşadəti ilə 1993-cü il dekabrın 11-də şəhidlik zirvəsinə ucalmışdı.