Şəhidlərimiz — I Qarabağ Müharibəsi

İntiqam Məmmədov 1971-ci il martın 15-də Gəncə şəhərində anadan olmuşdur. İntiqam kasıb bir ailədə böyümüşdü. 27 saylı texniki-peşə məktəbində oxumuş, sürücülük peşəsinə yiyələnmişdi. bacarıqlı və səbirli bir gənc idi. İntiqam Məmmədov 1988-1991-ci illərdə Naxçıvanda həqiqi hərbi xidmətdə olmuşdur. Layiqli xidmət göstərən gənc hərbçi Məmmədov dəfələrlə təşəkkür almışdı. Hərbi xidmətdən qayıtdıqdan sonra bir müddət mebel fabrikində işləmişdir.

İntiqam Məmmədov 1992-ci il iyulun 1-də Kəpəz Rayon Hərbi Komissarlığı tərəfindən əsgərliyə çağırılıb, 709 saylı hərbi hissədə xidmət etmişdi. Gözəl snayperçi idi. Ağdam, Füzuli, Laçın bölgələrində vuruşmuşdu. Bir neçə kəndin müdafiəsində böyük qəhrəmanlıq göstərmişdi. Dostlarının dərin hörmətini qazanmışdır. İntiqam Ramazan oğlu Məmmədov 1993-cü il iyul ayının 5-də Şelli kəndi uğrunda gedən qızğın döyüşlərdə şəhid olmuşdur.