Şəhidlərimiz — I Qarabağ Müharibəsi

Mehdiyev Rövşən Vaqif oğlu 1972-ci il sentyabrın 6-da Gəncə şəhərində anadan olmuşdur. Orta təhsilini Gəncədəki 28 saylı orta məktəbdə almışdır. Tarix fənnini yaxşı bildiyindən dəfələrlə respublikada keçirilən olimpiadaların qalibi olmuşdur. Rövşən orta təhsil aldıqdan sonra 1990-1992-cı illərdə Sovet ordusu sıralarında xidmətdə olmuşdur. Rövşən həqiqi hərbi xidmətdən qayıdanda artıq Qarabağ savaşı  başlanmışdı. Rövşən evdə rahat ola bilmirdi. O, cəbhəyə getməyə can atırdı.

Rövşən Mehdiyev 1993-cü il iyunun 8-də könüllü olaraq cəbhəyə yollanmış. 703 saylı hərbi hissənin tərkibində Ağdərə-Tərtər bölgəsində vuruşmuşdu. Döyüş yolu qısa olsa da, Rövşən zabitlər və əsgər yoldaşları arasında böyük hörmət qazanmışdı. Gənc hərbçi ona tapşırılan hərbi əməliyyatları layiqincə yerinə yetirirdi.

Rövşən Mehdiyev 1994-cü il aprelin 28-də Tərtər istiqamətində gedən qanlı döyüşlərin birində ağır yaralanmışdı. Həkimlər onun həyatını xilas edə  bilmədilər. Mehdiyev 1994-cü il mayın 2-də doğma torpağında dəfn olundu. Rövşənin xatirəsinin əbədiləşdirilməsi üçün dostları onun yaşadığı binanın qarşısında «şəhid bulağı» çəkdirmişlər.