Şəhidlərimiz — I Qarabağ Müharibəsi

Cavanşir Mehdiyev 1956-cı ilin fevralın 4-də Gəncə  şəhərində anadan olmuşdur. Ziyalı ailəsində böyüyən Cavanşir ailənin tək övladı idi. O, uşaq ikən şahmatı çox sevirdi. Dəfələrlə şəhər səviyyəsində keçirilən  yarışların iştirakçısı olmuşdur. Orta təhsilini Yeni Gəncə   qəsəbəsindəki 2 saylı orta məktəbdə aldıqdan sonra 1974-1976-cı illərdə Çitada həqiqi hərbi xidmətdə olmuşdur. Hərbi xidmətdən qayıtdıqdan sonra Büllur zavodunda mühəndis kimi çalışmışdır.

Cavanşir Mehdiyev milli azadlıq hərəkatında  fəal iştirak etmişdi.1994-cü il yanvarın 24-də könüllü olaraq cəbhəyə getmişdi. Birinci Gəncə taborunda vuruşmuşdu. Döyüş yolu cəmi 3 ay olsa da gənc hərbçinin hərbi nailiyyətləri  əvəz olunmazdır. Erməni qəsbkarlarına qarşı hazırlanan əməliyyatlarda fəal iştirak etmişdi. Cavanşir Əziz oğlu Mehdiyev 1994-cü il martın 20-də Ağdərə uğrunda gedən qanlı döyüşlərdə qəhrəmancasına şəhid olmuşdu. Məzarı Gəncə Şəhidlər Xiyabanındadır.