Şəhidlərimiz — I Qarabağ Müharibəsi

Qurbanov Sadiq Fikrət oğlu 16 mart 1973-cü ildə Gəncə şəhərində anadan olmuşdur. 25 saylı orta məktəbin 8-ci sinfini bitirdikdən sonra sürücülük peşəsinə yiyələnmişdir. O, 1991-ci ildə həqiqi hərbi xidmətə çağırılmış, Moskva şəhərində hərbi xidmətdə olarkən milliyətcə erməni olan komandiri onu çox incitdiyinə görə o, hərbi hissəni tərk edib Gəncə şəhərinə gəlmiş, buradakı hərbi polis dəstəsinə qoşularaq bir müddət Hacıkənddə təlim keçdikdən sonra döyüş bölgəsinə yola düşmüşdür. 773 saylı hərbi hissənin tərkibində qranatatan vəzifəsində erməni işğalçılarına qarşı vuruşmuşdur. O, nizam-intizamı, döyüş bacarığı ilə şəxsi heyətin böyük hörmətini qazanmışdır. Sadiq Qurbanov bir neçə döyüş əməliyyatlarında uğurla iştirak etmiş, həmçinin «Şiştəpə» əməliyyatı zamanı üç erməni quldurunu bir dəfəyə öldürmüşdür. Qurbanov Sadiq Fikrət oğlu 17 avqust 1992-ci ildə Hadrud uğrunda gedən döyüşlərdə ağır yaralanmış, cəbhə dostları tərəfindən Bakı şəhər hərbi hospitalına aparılsa da, həkimlərin səyinə baxmayaraq həmyerlimizin həyatını xilas etmək mümkün olmamışdır.