Şəhidlərimiz — I Qarabağ Müharibəsi

Mübariz Qurbanov 1965-ci il iyunun 5-də  Gəncə şəhərində anadan olmuşdur. Kasıb bir ailədə böyümüşdür. Mübariz 16 saylı məktəbi bitirmişdir. Mübariz 1985-ci ildə Kemerevo vilayətində hərbi xidməti başa vurandan sonra  gəncədə Toxuculuq kombinatında işləmişdir. Sonralar bir müddət 2 nömrəli Şərab Zavodunda çalışmışdır. Mübariz Qurbanov 1992-ci il martın 18-də Nizami Rayon Hərbi Komissarlığı tərəfindən səfərbərliyə alınmışdır. Birinci Gəncə Taborunun tərkibində Todan, Erkəc, Mənəş, Buzbulaq kəndlərinin, habelə keçmiş Şaumyan (indiki Aşağı Ağcakənd) rayonunun və Gülüstan qəsəbəsinin düşməndən təmizlənməsində iştirak etmişdir.

Mübariz Qurbanov 2 dəfə yaralansa da,  döyüş dostlarından ayrılmamışdır. Döyüş dostları arasında Mübarizin böyük hörməti vardı. Mübariz 1992-ci il iyul ayının 18-də yaralı dostunu xilas edərkən qəhrəmancasına şəhid olmuşdur. Cənazəsi 1992-ci il iyulun 20-də Gəncəyə gətirilərək Gəncənin Şəhidlər Xiyabanında dəfn olunmuşdur.