Şəhidlərimiz — I Qarabağ Müharibəsi

Quliyev Natiq Allahverdi oğlu 1963-cü ildə Gəncə şəhərində anadan olmuşdur. Atası Allahverdi Quliyev ziyalı idi, kənd təsərrüfatı elmləri namizədi idi. Natiq Quliyev 1981-ci ildə Azərbaycan Kənd Təsərrüfatı Akademiyasının «Mexanikləşdirmə» fakültəsinə daxil olmuşdur. 1990-cı ildə törədilən Qanlı  Yanvar hadisəsindən sonra qardaşı Namiqlə birlikdə işğalçılara qarşı mübarizəyə qalxmışlar. İkisi də Birinci  Gəncə batalyonunun tərkibində Çaykənd və Todan kəndləri uğrunda gedən döyüşlərdə böyük qəhrəmanlıqlar göstərmişlər. Natiq Quliyev 12 nəfərlik kəşfiyyat dəstəsinə rəhbərlik etmiş, müntəzəm surətdə könüllülər dəstəsini hərbi texnika ilə təchiz etmişdir. Namiq isə batalyon komandiri olmuşdur. 

Növbəti dəfə qardaşlara hərbi komandanlıq tərəfindən çox çətin tapşırıq verilmişdir. Qazax-Ağstafa zonasında rus hərbçiləri tərəfindən partladılmış anbardan silah gətirilərkən onların maşını 84 saylı rus diviziyasının əsgərləri tərəfindən saxlanılmışdır. Erməni gizirinin işarəsi ilə Natiq və Bahadur yerindəcə qətlə yetirilmiş, Namiq isə ağır yaralanmışdı. İgid komandir qara ciyərindən qan axsa da rus-erməni  faşistlərinin bir neçəsini öldürə bilmişdi. Namiqi yaralayan rus zabitini öldürən Rafiq Əhmədov yaralı vəziyyətdə hadisə yerindən qaça bilmişdir. Bütün bu deyilənlər onun xatirə dəftərindəndir. Namiq və Natiq Quliyev qardaşları 1991-ci il martın 14-də Gəncənin Şəhidlər Xiyabanında yan-yana dəfn olunmuşlar.