Şəhidlərimiz — I Qarabağ Müharibəsi

Quliyev Sərkar Həsən oğlu 3 fevral 1970-ci ildə Tovuz rayonunun Böyük Qışlaq kəndində anadan olmuşdur. Hələ uşaq yaşlarında ikən ailəsi ilə birlikdə Gəncə şəhərinə köçmüş Sərkar orta məktəbin 8-ci sinfini bitirdikdən sonra Gəncə şəhəri 38 saylı texniki-peşə məktəbində elektrik-qaynaqçı peşəsinə yiyələnmişdir. 1988-1990-cı illərdə Ukrayna Respublikasında həqiqi hərbi xidmətdə olmuşdur. O, hərbi xidmətdən qayıtdıqdan sonra 36 saylı «Mexanikləşdirilmiş səyyar dəstə»də çalışmışdır. Sərkar Quliyev 1991-ci ilin avqust ayında könüllü olaraq silaha sarılaraq  cəbhəyə yollanmış, 5477 saylı hərbi hissənin tərkibində Drambon, Umudlu, Kasapet, Maqavuz, Möhrətağ, Mehmani kəndləri uğrunda gedən döyüşlərdə çavuş kimi böyük şücaət göstərmişdir. Quliyev Sərkar Həsən oğlu 18 oktyabr 1992-ci ildə Ağdərə rayonunun Çıldıran kəndi uğrunda gedən döyüşlərdə qəhrəmancasına həlak olmuşdur.