Şəhidlərimiz — I Qarabağ Müharibəsi

Vidadi Qocayev 1956-cı il aprelin 13-də Gəncə şəhərində anadan olmuşdur. 17 saylı orta məktəbin 8 sinfinədək oxuduqdan sonra Vidadi 9 saylı peşə məktəbinin "Təyyarə Mühərriki Mühəndisi" ixtisasını bitirmişdir. Çox bacarıqlı gənc idi. Həqiqi hərbi xidməti 1974-1976-cı illərdə Murmansk vilayətinin Varkuta şəhərində keçirmişdi. 1978-ci ildən bir müddət Avia Masterskoyda öz peşəsi üzrə çalışmışdır. 1981-ci ildə ailə həyatı qurmuşdur. 1982-ci ildən Gəncə şəhəri Dəmir-beton zavodunda çalışmışdır. Kollektivin böyük hörmətini qazanan Vidadi dəfələrlə müdriyyət tərəfindən təşəkkür və pul mükafatlarına layiq görülmüşdü.

Vidadi Qocayev 1993-cü il iyunun 4-də könüllü olaraq cəbhəyə yollanmışdı. Gənc döyüşçü Qocayev 792 saylı hərbi hissədə xidmət etmişdi. Göstərdiyi hərbi igidlik  hərbi hissə komandiri tərəfindən layiqincə qiymətləndirilmişdi. Ağdam ətrafında vuruşmuşdu. Vidadi Hacı oğlu Qocayev 1993-cü il iyulun 27-də Ağdam ətrafında gedən qızğın döyüşlərdə şəhid olmuşdur. Məzarı Gəncənin Şəhidlər Xiyabanındadır.
Evli idi. 3 oğul övladı yadigar qalmışdır.