Şəhidlərimiz — I Qarabağ Müharibəsi

Şakir Kərimov 1965-ci il avqustun 11-də Gəncə şəhərində anadan olmuşdur. Şakirin namərd erməniləri görən gözü yox idi. Gəncə şəhər 6 saylı orta məktəbi bitirmişdir. Şagird olarkən Şakir dəfələrlə  respublika olimpiadalarının layiqli iştirakçısı olmuşdur. O, 1983-1985-ci illərdə Qazaxıstanın Taldı-Kurqan şəhərində həqiqi hərbi xidmətdə olmuşdur. Qayıtdıqdan sonra Avtomobil zavoduna işə girmişdir. Zavod rəhbərliyinin göstərişi ilə 1987-ci ildə Ulyanovsk şəhərində Avtomobillərin İstismarı İnstitutuna daxil olmuşdur. Orada da ailə qurmuşdur. 1988-ci ildə Azərbaycanda yaranmış vəziyyətlə əlaqədar vətənə qayıtmış və könüllü hərbi xidmətə getmişdir.

161 saylı hərbi hissədə vuruşmuş, tağım komandirinin müavini vəzifəsində xidmət edən gizir Kərimov döyüş dostları arasında böyük hörmət qazanmışdı.

Şakir Fərman oğlu Kərimov 1995-ci il fevralın 14-də Ağdam ətrafında gedən döyüşlərdə həlak olmuşdur.  2 oğlu var. Məzarı Gəncənin Şəhidlər Xiyabanındadır.