Şəhidlərimiz — I Qarabağ Müharibəsi

İsgəndərov İbrahim İslam oğlu 16 dekabr 1974-cü ildə Gəncə şəhərində anadan olmuşdur. Orta məktəbin 8-ci sinfini bitirdikdən sonra təhsilini 9 saylı texniki-peşə məktəbində davam etdirmiş və qaynaqçı peşəsinə yiyələnmişdir. İbrahim İsgəndərov 28 dekabr 1992-ci ildə Kəpəz Rayon Hərbi Komissarlığı tərəfindən həqiqi hərbi xidmətə çağırılmış, bir müddət Şəmkir rayonunun Seyfəli kəndində döyuş hazırlığı keçdikdən sonra 998 saylı hərbi hissənin tərkibində xidmət etməyə başlamışdır. İbrahim İsgəndərovun ilk döyüş yolu Sırxavənddən başlamış, bir neçə döyüş tapşırıqlarında iştirak etmişdir. İsgəndərov İbrahim İslam oğlu 16 yanvar 1993-cü ildə Ağdərə rayonunun Vəng kəndi ətrafında gedən qızğın döyüşlərdə qəhrəmancasına həlak olmuş və meyiti Gəncə şəhərinə gətirilərək Şəhidlər Xiyabanında dəfn olunmuşdur.