Şəhidlərimiz — I Qarabağ Müharibəsi

Abbasov Şəmil Kamil oğlu 1959-cu il mart ayının 22-də Gəncə şəhərində anadan olmuşdur. 4№-li internat məktəbinin 8-ci sinfinədək oxuyan Şəmil 1973-cü ildə 27 saylı texniki-peşə məktəbini bitirmişdir. Gön-dəri məmulatının emalı ixtisasına yiyələnmişdir. Bir müddət ayaqqabı tikiş sexində işləmişdir.

Şəmil Abbasov 1976-1978-ci illərdə Həştərxanda həqiqi hərbi xidmətdə olmuşdur. 1979-cu ildən Gəncə şəhəri 1 saylı ayaqqabı məmulatları sexində əmək fəaliyyətinə başlamışdır. 1990-cı ildə Şəmil Abbasov ailə həyatı qurmuşdur. Qəlbi hər an vətən harayı ilə döyünən Şəmil Abbasov Dağlıq Qarabağ savaşı başlanan kimi könüllü olaraq cəbhəyə getməsi üçün komissarlığa müraciət etmişdir.

1991-ci il dekabrın 19-da Nizami Rayon Hərbi Komissarlığı tərəfindən səfərbərliyə alınmışdır. 1-ci Gəncə taborunda atıcı idi. Göstərdiyi hərbi şücaətə görə dəfələrlə ruhlandırıcı mükafatlara layiq görülmüşdür. Əsgər yoldaşlarının rəğbətini qazanmışdır. 1992-ci il iyunun 3-də Ağdərə uğrunda gedən döyüşlərdə şəhid olmuşdur. Abbasov Şəmil Kamil oğlunun məzarı Gəncə Şəhidlər Xiyabanındadır. Mərhumun Günay adlı yeganə övladı yadigar qalıb.