Şəhidlərimiz — I Qarabağ Müharibəsi

Hüseynov Saməddin Fərman oğlu 1973-cü il iyulun 27-də Gəncədə anadan olmuşdur. Saməddin orta təhsilini Gəncə şəhər Yeni Gəncə qəsəbəsindəki 2 nömrəli orta məktəbdə almışdır. Dəfələrlə müxtəlif bilik yarışlarında iştirak etmişdi. Respublika olimpiadalarının fəxri fərmanı ilə təltif olunmuşdu.
Saməddin Hüseynov 1992-ci ildə Nizami Rayon Hərbi Komissarlığı tərəfindən həqiqi hərbi xidmətə  çağırılmışdı. Lənkəranda rabitə batalyonunda rabitəçi vəzifəsində xidmət etmişdi. Göstərdiyi hərbi xidmətə görə zabit-gizir heyəti arasında böyük hörmət qazanmışdı. Əsgər yoldaşlarının hər an köməyinə çatan Saməddin hərbi hissənin fəxri fərmanına layiq görülmüşdü.

Saməddin Hüseynov Beyləqan-Ağdam bölgə-sində, xüsusən Şelli kəndinin müdafiəsində əsil qəhrəmanlıq göstərmişdi.  Yüksək hərbi xidmətinə görə hərbi hissə komandiri tərəfindən Hüseynovun ailəsinə təşəkkür məktubu göndərilmişdi.

Saməddin Hüseynov 1993-cü ilin qış günlərində Beyləqanda döyüş zamanı dostlarını xilas edərkən yaralanıb, dekabrın 15-də əbədi olaraq gözlərini yummuşdu.

Hüseynov Saməddin Fərman oğlu Gəncə şəhər Şəhidlər Xiyabanında dəfn olunmuşdur.