Şəhidlərimiz — I Qarabağ Müharibəsi

Anar Əsgərov 1971-ci il iyulun 5-də Gəncə şəhərində anadan olmuşdur.   Orta təhsilini 25 saylı məktəbdə almışdır. Çox bacarıqlı və təvazökar gənc idi. Məktəbdə əlaçı şagird kimi tanınırdı. Uşaqlıqdan ermənilərə nifrət etmişdi. Orta məktəbi bitirdikdən sonra təhsilini Gəncə Politexnik İnstitutunda davam etdirmişdir. İdmanla məşğul olan Anar 1990-cı ildə institutda keçirilən boks üzrə yarışın qalibi olmuşdur. O, 1992-ci ildə institutu fərqlənmə diplomu ilə bitirmişdir.

Anar Əsgərov 1993-cü il martın 4-də Kəpəz Rayon Hərbi Komissarlığı tərəfindən həqiqi hərbi xidmətə çağırılmışdı. 770 saylı hərbi hissədə vuruşmuşdu. Bir neçə dəfə qızğın döyüşlərdə iştirak etmişdi. Döyüş yolu qısa olsa da, Anar qazandığı hərbi nailiyyətlərə görə hərbi hissənin fəxri idi. Dəfələrlə erməni işğalçılarına qarşı hazırlanmış hərbi əməliyyatlarda  fəal iştirak etmişdi. Hücumda hər an öndə olardı.

Anar Qurban oğlu Əsgərov xidmətə getdiyi gündən 1 il sonra, yəni 1994-cü il martın 3-də Füzuli rayonunda qəhrəmancasına şəhidlik zirvəsinə ucalmışdı. Məzarı Gəncə Şəhidlər Xiyabanındadır.