Şəhidlərimiz — I Qarabağ Müharibəsi

1969-cu ildə anadan olmuş Şahlar Hüseynov Moskvada hərbi xidmətdə olmuşdur. Əsgərlikdən qayıtdıqdan sonra 27 saylı texniki-peşə məktəbini bitirərək Alüminium zavodunda çilingər işləməyə başlamışdır. 1992-ci ilin fevral ayında törədilən Xocalı soyqırımı Şahlar Hüseynova çox pis təsir etmiş, fevralın 27-də könüllü olaraq Gəncə batalyonuna yazılmışdır. Tağım komandiri Şahlar Hüseynov erməni dilini mükəmməl bildiyi üçün tez-tez kəşfiyyata gedər, məlumatlar gətirər və sonra hücum vaxtı oraları yerlə yeksan edərdi. Döyüş dostları deyirdilər ki, Şahlar Hüseynov xüsusən Tərtər rayonunun Şəfəq kəndində daha böyük hünərlə vuruşmuşdu, düşmənin xeyli hissəsini, texnika və canlı qüvvəsini məhv etmişdi. Şahlar Hüseynov növbəti döyüşlərin birində, 1992-ci il aprel ayının 10-da şəhidlik zirvəsinə ucalmışdır. Göstərdiyi rəşadətə və hünərə görə 1992-ci ilin iyun ayında Azərbaycan Respublikası Prezidentinin fərmanı ilə Milli Qəhrəman adına layiq görülmüşdür.