Şəhidlərimiz — I Qarabağ Müharibəsi

Vüsal Əliyev 1980-ci il iyul ayının 2-də anadan olmuşdur. Orta təhsilini 10 №-li orta məktəbdə almışdır. Orta məktəbi əla qiymətlərlə bitirən Vüsal məktəbin fəxri idi. Dəfələrldə respublika səviyyəli olimpiadaların qalibi olmuşdur. Uşaqlıqdan boksla məşğul olan Vüsal bir neçə dəfə beynəlxalq turnirlərin layiqli iştirakçısı olmuşdur.

Vüsal Əliyev orta məktəbi bitirdikdən sonra 1997-ci ildə Azərbaycan Dövlət Pedaqoji Universitetinin hərbi fakültəsinə daxil olmuşdur. 2001-ci ildə həmin universiteti fərqlənmə diplomu ilə bitirmişdir.

Vüsal Əliyev 2002-ci il dekabrın 25-də hərbi xidmətə çağırılmışdır. Ağcabədidə xidmət etmişdir. Baş leytenant Əliyev  tez bir zamanda xidmət etdiyi hərbi hissədə böyük hörmət qazanmışdı. Dəfələrlə hərbi hissə komandiri tərəfindən təşəkkürə layiq görülmüşdür.

Vüsal Bayram oğlu Əliyev 2004-cü il iyunun 11-də Xocavənd təpəliyində yaralı əsgəri döyüş bölgəsindən çıxararkən düşmən snayperinin gülləsinə tuş gəlmişdir. Hərbi xidməti başa vurmağa 10 gün qalmış Vüsal Əliyev qəhrəmancasına şəhidlik zirvəsinə ucalmışdır. 

Cəsur həmyerlimiz Vüsal Əliyev 2004-cü il iyunun 12-də Gəncə Şəhidlər Xiyabanında dəfn olunmuşdur.