Şəhidlərimiz — I Qarabağ Müharibəsi

Əliyev Emin Elmar oğlu 1 yanvar 1988-ci ildə Gəncə şəhərində anadan olmuşdur. 46 saylı orta məktəbin 8-ci sinfini bitirdikdən sonra Bakı şəhərinə getmiş və təhsilini davam etdirərək 153 saylı orta məktəbin 9-cu sinfini bitirdikdən sonra 2003-cü ildə Naxçıvanski adına Hərbi Liseyə daxil olmuş və 2006-cı ildə həmin liseyi əla qiymətlərlə bitirmişdir. Emin Əliyev həmin il H.Əliyev adına Azərbaycan Ali Hərbi məktəbinə qəbul olmuşdur. 2010-cu ildə gənc həmyerlimiz həmin təhsil ocağını bitirdikdən sonra təhsilini Silahlı Qüvvələrin Təlim Tədris Mərkəzində davam etdirmiş və oranı bitirib MN-nin 24 iyun 2011-ci il tarixli müvafiq əmri ilə xidmətini davam etdirmək üçün 181 saylı hərbi hissədə ehtiyat motoatıcı taborun motoatıcı tağım komandiri vəzifəsinə təyin edilmişdir. Emin Əliyev məzuniyyətdən qayıtdıqdan sonra 29 iyul 2011-ci ildə həmin hərbi hissədə xidmətə başlamış, 2 aydan sonra korpus komandirinin 7 oktyabr 2011-ci il tarixli müvafiq əmri ilə həmin hərbi hissənin ön cəbhədə yerləşən motoatıcı taborunun tağım komandiri vəsifəsinə təyin olunmuşdur. Emin Əliyev nizam-intizamı və qabiliyyəti ilə zabitlərin arasında xüsusilə seçilmiş, həmçinin qayğıkeş bir zabit kimi şəxsi heyətin böyük hörmətini qazanmışdır. Əliyev Emin Elmar oğlu 2 noyabr 2011-ci ildə xidməti vəzifəsini yerinə yetirən zaman düşmən gülləsinin qurbanı olmuş, 3 noyabr 2011-ci ildə meyiti Gəncə şəhərinə gətirilərək Şəhidlər Xiyabanında dəfn olunmuşdur.