Şəhidlərimiz — I Qarabağ Müharibəsi

Səmədov Pərviz Əbdüləhəd oğlu 5 may 1970-ci ildə Gəncə şəhərində anadan olmuş, səkkizinci sinfi bitirdikdən sonra 1985-ci ildə təhsilini 15 saylı texniki-peşə məktəbində davam etdirərək avtomobil çilingəri ixtisasına yiyənmişdir. 1988-1990-cı illərdə Çita şəhərində əsgəri xidmətdə olmuşdur. O, 1992-ci il fevralın 22-də könüllü olaraq Ağdama gedərək kəşfiyyat dəstəsinin komandiri kimi Şelli, Naxçıvanik, Aranzəmin, Pircamal kəndləri uğrunda gedən döyüşlərdə şəxsi igidlik nümunələri göstərmişdir. Onun kəşfiyyat dəstəsi düşmənin silah-sursat anbarlarını, strateji obyeklərini və sığınacaqlarını aşkarlayaraq məhv etmişdir. 1992-ci il mayın 15-də Gülablı kəndində gedən döyüşlərdə Pərviz Səmədovun bölüyü də ölüm-dirim savaşına atılmışdır. Bu igidlər əsl döyüşçü cəsarəti və inandkarlığı göstərərək, ermənilər tərəfindən vurulmuş «təcili yardım» vertolyotunun ekipajını xilas edə bilmişlər. Lakin igid komandir Pərvizin özü isə snayper gülləsinə tuş gələrək həlak olmuşdur. Azərbaycan Respublikası Prezidentinin 7 iyun 1992-ci il tarixli 833 saylı fərmanı ilə Pərviz Əbdüləhəd oğlu Səmədova Milli Qəhrəman fəxri adı verilmişdir. Hazırda igid Pərvizin adını ondan yadigar qalan balaca Pərviz yaşadır.